نصائح للسفر بالعربية الصيف ده
الصيف قرب وكتير مننا بدأ يحضر لسفرية جديدة يريح فيها أعصابه من الضغوط اليومية، وأكيد ان اخر حاجة بنكون عايزنها وقت السفر ده ان عربياتنا تعطل على الطريق. جمعنا لك هنا 8 نصائح مهمة جداً تقدر تتجنب بيها مشاكل ممكن تواجهك لو انت في رحلة طويلة
اتأكد من كفاءة الإطارات
عشان تضمن أقصى مستوى أمان وراحة وكمان توفير في البنزين، لازم تتأكد من كفاءة إطارات العربية. اتاكد ان ضغط العجل في المستوي المناسب لموديل عربيتك و انه ميكنش مرتفع او منخفض بزيادة. اتاكد كمان ان الحالة العامة لإطارك جيدة ويكون خالي من اي خدوش او مشاكل. افحص الاربع عجلات بالإضافة للاستبن
فحص زيت الموتور
زيت المحرك من أهم السوائل في عربيتك وهو الي بيضمن تشحيم مكونات المحرك بشكل كافي عشان يقلل الاحتكاك ويحمي الموتور. عشان تفحص الزيت كل الي محتاجه مقياس العمق و ده بيكون موجود في حجرة المحرك وبيكون لونه عادة أصفر او برتقالي. اول خطوة طلع المقياس وامسحه في فوطة قديمة وبعد كدة دخله تاني و طلعه و بكدة تقدر تشوف مستوى الزيت. لو كان اقل من المستوى المطلوب هتحتاج تزوده. لون الزيت كمان مؤشر مهم لجودته. اتاكد ان لون الزيت أصفر أو عسلي لو لونه بني غامق او اسود يبقى محتاج يتغير.
فحص باقى السوائل
على حسب موديل عربيتك ممكن تحتاج تملى زيت الفتيس ، وزيت الباور ، مياه التبريد، وزيت الفرامل. اتاكد من دليل عربيتك عشان تعرف اكتر.
فحص الفرامل
حاول تركز مع فرامل عربيتك قبل الرحلة بحوالي أسبوعين. لو سمعت اي صوت غريب مع دوسة الفرامل او حسيت بأي هزة سواء في الفرامل او الدركسيون، ده بيكون موْشر انك تكشف على العربية عند مركز صيانة مختص.
فحص التكييف
مع زيادة درجة الحرارة في الصيف، وفي رحلة زي دي لازم يكون تكييف عربيتك شغال وبكفاءة عالية. قبل سفرك باسبوع على الاقل اتاكد ان الهوا اللي طالع من التكييف يكون ساقع بالشكل المطلوب. عشان لو لقيت ان الهوا دافي يكونعندك وقت كافي تروح لحد مختص وتفحصه.
جهز شنطة الطوارىْ
حتى بعد كل الاحتياطات اللي فاتت ممكن يحصل حاجة غير متوقعة، فا لازم تجهز شنطة يكون فيها كل المستلزمات زى كشاف و بطاريات زيادة و كابلات تقوية لبطارية العربية ومجموعة أدوات ومستلزمات الإسعافات الأولية
فحص المساحات
عشان ازاز العربية يبقى نظيف طول الرحلة لازم تتأكد ان المساحات شغالة بالشكل المطلوب. لو بتسيب اثر او خطوط بدلها بمساحة جديدة. املى كمان خزان بسائل المساحات للاخر
فحص الفوانيس
مهم جدا تراجع على كل فوانيس الإضاءة انها تكون شغالة و منها إضائة الوقوف، و النور العالي والعادي ، و نور الرجوع للخلف و نور الإشارات
نصيحة إضافية: حاول متسافرش وقت الظهر عشان تتجنب السواقة في الحر و الشمس و خد فترات راحة متكررة عشان تدي فرصة للعربية تبرد